॥হেৰুৱা সপোন ॥

॥হেৰুৱা সপোন ॥

হেৰুৱা সপোন এটাৰ
পম খেদি অনাই বনাই ঘূৰি ফুৰোতেই
লগ পাইছিলো তেওঁক ।
তেওঁ সপোনটোলৈ বাট দেখুৱাব খুজিছিল
আৰু সংগী হোৱাৰ কথা দিছিল
আৰু মই --
তেওঁৰ সতেই আগবাঢ়িছিলো
হাতে হাত ধৰি ।
আৰু এদিন 
এজাক ধুমুহা অহাৰ উমান পাই
তেওঁ আতৰি গৈছিল
মোক অকলশৰীয়া কৰি।
আৰু মই ?
মই ধুমুহাত ভাগি পৰিছিলো,
দুখৰ শীতত বৰফ হৈছিলো
আৰু লাহে লাহে
পাহৰি পেলাইছিলো মোৰ সপোনটো ,
তাৰ পিছত ,
বৰ সযতনে গঢ়ি লৈছিলো
এখন দুখৰ প্ৰাচীৰ
মোৰ বৰফ হৈ যোৱা
হৃদয়ৰ চাৰিওফালে ।
কাৰণ ,
মই আৰু সপোন দেখিব খোজা নাছিলো
আৰু এইবাৰ-- 
তুমি আহিছা,
মোক ভালপোৱাৰ কথা কৈছা,
সপোন দেখুৱাব খুজিছা,
আৰু কি আচৰিত !
তোমাৰ প্ৰেমৰ উত্তাপত
মই গলিবলৈ আৰম্ভ কৰিছো
ক্ৰমশঃ !

ৰঞ্জুমণি মহন্ত
23.01.2016